Dyma sioe i’r teulu cyfan wedi’i pherfformio gan gyn-gyfarwyddwr artistig Little Angel Theatre, Steve Tiplady. Ynddi mae pypedwaith, cysgodion, rhithiau a cherddoriaeth arbennig yn cael eu cyfuno i greu sioe sy’n ffraeth a dyfeisgar.
Mae Pinocchio yn cael ei gerfio’n fyw ar y llwyfan, mae brwsh yn troi’n llwynog ac mae cysgod dau lif yn troi’n siarc anferth wrth i Geppetto ddefnyddio gwrthrychau o weithdy’r saer i adrodd hanes y pyped sydd am fod yn fachgen go iawn, a’r gwneuthurwr pypedau sydd eisiau bod yn dad go iawn. Mae elfen o waith byrfyfyr yn gwneud pob perfformiad yn unigryw i’r gynulleidfa.
Mae Indefinite Articles, sydd wedi ennill llu o wobrau, ar flaen y gad ym Mhrydain gyda’u pypedwaith newydd ac wedi gweithio gyda’r RSC, Improbable Theatre a’r Mighty Boosh.
