Search results

Theatr y Sherman yw’r Theatr i Gymru yng Nghaerdydd. Fe’i sefydlwyd diolch i rodd hael gan Sefydliad Harry ac Abe Sherman, ac o ganlyniad i weledigaeth ac egni’r Cyfarwyddwr Sefydlu, Geoffrey Axworthy yn ystod amser nid oedd llawer o theatr byw yng Nghaerdydd. Dros yr hanner can mlynedd diwethaf, mae Theatr y Sherman wedi dangos perfformiadau cyntaf rhai o ddramâu pwysicaf Cymru, wedi hyrwyddo lleisiau awduron sy’n byw ac yn dod o Gymru, wedi cyflwyno theatr i gannoedd ar filoedd o blant, ac wedi chwarae rôl sifig nodedig drwy waith arloesol yn ymgysylltu â’r gymuned. Er bod y rôl, yr enw, ac ymddangosiad yr adeilad wedi newid dros y blynyddoedd, mae’r Sherman wedi aros yn gyson fel adnodd sifig ar gyfer pobl Caerdydd a’r de-ddwyrain. Heddiw, Theatr y Sherman yw un o brif theatrau cynhyrchu Prydain, ac mae’n un o sefydliadau diwylliannol pwysicaf Cymru. Mae’r hyn mae’r Sherman wedi’i gyflawni i’w ddiolch yn bennaf i ymdrechion cydweithwyr drwy ei hanes, cefnogaeth ei phartneriaid ariannu, teyrngarwch ei chynulleidfaoedd, a rhagoriaeth, angerdd a chreadigrwydd ei hartistiaid.